MBA le nang - Part 1

Kha bang zah hiam paita in magazine article di dan a MBA tawh kisai thu gelh din kana kisa a. Hilele a rem lou a om ziak in ah publish theihlouh in a om nilouh a. Kana gelh khiak bang zah hiam a om a, zat nang om loua om sang in hiai kon post him him ahi. Ka gelh zawh nai louh ziak in a, part bangzah hiam kon suah dia. Asim ten honna ngai siam unlan, adang te gelh zel di kahi. Hiai anuai a kon post ahih leh apat na ahi.


Master of Business Administration (MBA) kichi tulai in a thang mah mah a. Bang hihiam chih le nang adin bang phatuam na om hiam chih i gen khawm di.

MBA ahih le Post Graduate course ahia, chi (flavor) tuam tuam tampi a om hi. Himah leh a minthang deuh pen ahih le kum nih sung full time course ahia, graduation stream khat peuh a zo te sin theih ahi. College zo phet a sin theih ahi na a, kum bang zah hiam sepna a neita ten le MBA zir to tampi a om uhi.

MBA college hoih tak apat zir zo te adin company hoih tak leh lawh hoih mah mah, khawvel mun tuam tuam a sep theih na lampi hon hong hi. Hiai ziak mah in tulai in MBA zir di mi a tam mah mah ta ua, competition a sang pet mah hi. MBA ahih le course thak ahi kei a, 1954 lam pek in FMS, tulai a MBA zirna lar mah mah, ana kipan ta a, IIM Calcutta bang 1961 in ana kipan hi. MBA ahong than mah mah ziak nih aom hi. Khatna ah, Indian economy liberalized ahih nung in international company ahong tam mah mah ua, huai a sem din MBA a pawimawh sem sem uhi. Anihna ahih le, Government ah sepna aki daih nawn kei a, lekhasiam tam pi te sepna mulo in a om ua, amau private company a sep hong ngai hi.

Indian economy akhang hat mah mah a, khawvel a gam khang hat pen pen te lak a khat ahi. Investment company minthang Goldman Sachs in study ana bawl na ah, BRIC (Brazil, Russia, India leh China) gamte hong khang didan leh kum bang zah hiam nung a khawvel a gam hausa leh thupi pen pen te ahong hih didan uh chiang tak in ana gen hi. Hiai ahih le India ah multinational company leh private company pung deuh deuh di ahi. Huai kia hilouin, public sector company te bang privatization ziak in, government khut nuai a kep apat private company suah sak di thu a thang hi. Huai ahih le professionals tamsem pawimawh di ahia, MBA zoute bang deihna sang sem di ahi.

Tulai a MBA zoute atam zaw company lian leh hoih penpen te ah asem ua, college a kai sung mah mah un sepna di limchi tak tak a mu uhi. A sep chiang un le na pawimawh tak guan ahi ua, lawh mu tam pen pen te ahi uh. Thu chiangzaw maban a section te – MBA zir na di, MBA zir sung leh Sepna lam chihte aban ah hong om di hi.